"თითქმის ათ წელზე მეტია, რაც ერთი ქალი ბარბალე დანელიას ასული ქურდობს და ყაღაჩობს. ბარბალა დანელიას ქალი 35-40 წლის იქნება და თავზარს სცემს სოფლელებს, რამდენი თავმომწონე ყმაწვილი ჩამოუხტუნებია ცხენიდან და გაუძარცვავს, რამდენი ავქალობა ჩაუდენია და სასამართლობში ჰქონია მაგრამ ყოველთვის გამომძვრალა და არხეინად დათარეშობს სოფელ-სოფელ, სხვისი ნაშრომის მისათვისებლად", - წერდა მეგრელ მძარცველ ქალზე 1898 წლის 5 სექტემბრის "ცნობის ფურცელი".

მე-19 საუკუნის მძარცველ ქალზე წერდა მაშინდელი უცხოური პრესაც. ქართულ და უცხოურ პრესაში ბარბარე დანელიაზე ცნობები გიგა ქავთარაძემ მოიძია, მეგრულ ენაზე თარგმნა.

"პირველად ბარბარე დანელიაზე ონლაინპლატფორმა ნეტგაზეთზე წავიკითხე სტატია, შევიტყვე, რომ მის შესახებ ცნობები ამერიკულ პრესაში მკვლევარ პავლე ჯაგუნავას მოუძიებია. შემდეგ გივი ქარჩავას დახმარებით, მოვიძიე გაზეთების პდფ ვერსიები, რომელიც ვთარგმნე მეგრულ ენაზე", - უთხრა "ლაივპრესს" გიგა ქავთარაძემ.

"ცნობის ფურცელი"-1898 წლის 5 სექტემბერი.

ის გვიყვება, რომ ცნობილ მეგრელ ქალზე, ქართული და უცხოურ პრესაში ბევრი იწერებოდა, თუმცა უცხოურ პრესაში მისი პერსონა უფრო რომანტიზებული იყო.

ბარბარე დანელია იყო 35-დან 40 წლამდე ლამაზი, ჭკვიანი, მამაცი ქალი, რომელიც მამაკაცების ბანდას მეთაურობდა ქუთაისის გუბერნიაში.

"ქართულ გაზეთებში მას მას მოიხსენიებდნენ ბარაბარე დანელიად, უცხურში ბარბარად, სინამდვილეში, ის ბარბალე დანელია იყო მარტვილის სოფელ ბანძადან. "ცნობის ფურცელში", "ივერია", მას წერდნენ, როგორც "ავქალზე", ყაჩაღზე, მძარცველზე, ადამიანზე, ვინც შიშის ზარს სცემდა სხვებს. უცხოურ გაზეთებში კი ქალთა ემანსიპატორად გვევლინება. წერდნენ, რომ მსოფლიოში ქალთა ემანსიპაცია წინ მიიწევს, და ამისი ერთი მაგალითია ბარბარა დანელია. ასევე უცხოური პრესის მიხედვით, ის თავაზიანად ექცევა მსხვერპლს, ბოდიშს უხდის შექმნილი დისკომფორტის გამო, და თუ მსვერპლი წინააღმდეგობის გარეშე დაჰყვება მის ნებას, შესაძლოა მასთან ერთდ ღვინოც კი დალიოს, ცოტა ფულიც დაუტოვოს", - ამბობს გიგა ქავთარაძე.

მისივე თქმით, უცნობია, რამ უბიძგა ქალს სოფელი, სახლ -კარი მიეტოებინა და ტყეში საყაჩაღოდ გასულიყო.

"ქართული წყაროების მიხედვით ის 1898 წელს მოკლეს. მანამდე კი 10 წლის განმავლობაში იყო ბანდიოს მეთაური. ამ ხნის განმავლობაში უამრავჯერ დაუჭერიათ, თუმცა ყოველთვის ახერხებდა თავის დაძვრენას. არის ცნობა, რომ შეყვარებია იმ პოლიციელს, რომელმაც დააკავა, შემდეგ ის მასთან ერთდ გაქცეულა და შეერთებია მის ბანდას. იყო ასევე შემთხვევები, რომ ციხიდანაც გააპარეს. ჰყავდა თუ არა ქმარი, ეს ცნობა არსად შემხვედრია, თუმცა შვილების შესახებ არის ინფორმაცია", - ამბობს გიგა ქავთარაძე.

ჟურნალი "სქანი".

მისივე თქმით, სტატიების გაცნობის შემდეგ მაინც უცნობი რჩება, რამ მიიყვანა ჭკვიანი და ლამაზი ქალი იქამდე, რომ ტყეში ყაჩაღად გავარდნილიყო.

მისი სტატიის სათაურიც ასეთია, - ბარბარე დანელია, ბანდიტების მეთაური ქალი, რუსი ბანდიტი, თუ პატარა ქვეყნის უბედური შვილი.

სტატია დაიბეჭდა ჟურნალ "სქანის" მესამე ნომერში, რომელიც უკვე გაყიდვაშია.

პირველი მეგრულენოვანი ჟურნალი"მარგალურ ნინაშ ასოციაციამ" [მეგრული ენის ასოციაციამ] გამოსცა, რომლის დამფუძნებლებიც გივი ქარჩავა და გიგა ქავთარაძე არიან.