საზოგადოება
ტოლერანტული სოფელი სამეგრელოში [ვიდეო/ფოტო]
FaceBook Twitter
E-mail Print
სიმწვანეში ჩაფლული მინდვრები, გზებზე პირუტყვი და მიწაზე მომუშავე გლეხები სამეგრელოში გაზაფხულის ერთი ჩვეულებრივი პასტორალი იქნება, რომ არა მუსლიმების ლოცვის ხმა, რომელსაც ქვით ნაგებ შენობამდე მივყავართ, სადაც პარასკევის ტრადიციული ლოცვა სრულდება.

მეჩეთი, რომელიც ხობის სოფელ შავღელეში მდებარეობს, სამეგრელოში ერთადერთია. მუსლიმები აქ 1989 წლიდან ცხოვრობენ, ისინი ქედა, შუახევი და ხულოდან ძლიერი წყალდიდობის შემდეგ ჩამოსახლეს. ეკომიგრანტებმა თავიანთი სალოცავი 2004 წელს შემოწირულებებით ააშენეს.

"ჩვენ მთიანი სოფლებიდან ვართ და თავიდან უცხო იყო აქაურობა - დაბლობი, თუმცა მერე ღმერთის წყალობით შევეჩვიეთ და მივიღეთ ეს ადგილი ჩვენს მამულად და განვაგრძეთ ცხოვრება, დავმეგობრდით, დავმეზობლდით. რა თქმა უნდა ბევრი სიძნელეც იყო, შიმშილი, ომი, უგზოობა, უწყლობა, თუმცა ახლა გზა კეთდება და სკოლაც შენდება", - ამბობს მუსლიმთა სულიერი წინამძღვარი ზურაბ ტარიელაძე.

ის მადლიერებას გამოხატავს იმის გამო, რომ ქრისტიანები ყოველ დღესასწაულზე მათთან მოდიან და ულოცავენ.

"ძალიან პატივს ვცემთ ადგილობრივ ხალხს, ადგილობრივი მთავრობაც ქრისტიანია, ისინი პატივს გვცემენ, ტოლერანტობას იჩენენ ჩვენს მიმართ, რომ ჩვენი რელიგია დაფასდეს, ისინი ყველა დღესასწაულზე მოდიან ჩვენთან და გვილოცავენ, სამლოცველოსთან გზა მოგვიყვანეს, სასაფლაო შემოგვიღობეს, 2 ჰექტარი, ეს პატარა ადგილი არ არის", - ამბობს ზურაბ ტარიელაძე.

მეჩეთიდან 300 მეტრში ეკლესიიის მშენებლობა დაიწყო, თუმცა მუსლიმები ამბობენ, რომ ამაში პრობლემას ვერ ხედავენ.

"რაც საჭირო იქნება არ დავიშურებთ არაფერს, თუნდაც ერთი აგური რომ იყოს, დავდებთ და გავაკეთებთ ყველაფერს, ოღონდ ილოცონ და ირწმუნონ. ღმერთის გაჩენილ მიწაზე ყველას აქვს უფლება ირწმუნოს და ილოცოს როგორც თვითონ სურს და არავის აქვს უფლება შეუზღუდოს ვინმე ლოცვა", - ამბობს ადგილობრივი გია ქამაშიძე.

ის ჯამეს ეზოში დაკრძალულ მუსლიმთა და ქრისტიანთა საფლავებსაც გვიჩვენებს.

"თუ რამე დახმარებაა საჭირო, გვერდში ვუდგავართ ერთმანეთს და ისინიც ისე იქცევიან როგორც ჩვენ", - ამბობს ადგილობრივი.

განსხვავებული რელიგია არ გვიშლის ერთმანეთის ჭირის და ლხინის გაზიარებაში, -ამბობს სოფელში მერის წარმომადგენელი ხათუნა მანველიძე, რომელიც მართლმადიდებელი ქრიტიანია.

" 7 წელია ამ თანამდებობაზე ვარ და პრობლემა არ მქონია მოსახლეობასთან ურთიერთობაში. აღდგომაზე, ჩემი ოჯახის წევრების შემდეგ პირველი ბატონი ზურაბი (ტარიელაძე) მილოცავს და მეც ასე ვარ ბაირამზე. სხვათაშორის, ბატონი ზურაბის და სოფლის აქტივის იდეა იყო, რომ ეკლესია და მეჩეთი გვერდიგვერდ ყოფილიყო", - ამბობს ხათუნა მანველიძე.

სოფელში ამჟამად 192 კომლი ცხოვრობს. "ბირჟაზე" განსხვავებული რწმენის მქონე მეზობლები ისე იკრიბებიან, როგორც სხვა სოფლებში და ერთმანეთთან ქვეყანაში მიმდინარე მოვლენებს განიხილავენ.

ერთ-ერთი, ოლეგ ჯანანაშვილი ქრისტიანია, ამბობს, რომ მუსლიმებთან არაფერი აქვს გასაყოფი.

"ქალი (ცოლი) მუსლიმი მყავს, მაგრამ აღდგომაზე ოჯახში კვერცხებს წითლად ღებავს. აქ კარგი ურთიერთობა გვაქვს ყველას ერთმანეთთან".

მეზობლები ამბობენ, რომ პატარა კონფლიქტი ყველგან ხდება, თუმცა ის ადვილად გვარდება.

"უშეცდომო არავინაა, მაგრამ პატარ-პატარა კონფლიქტები არ უნდა გამწვავდეს, - ამბობს მუხრან ქათამაძე.

"შეცდომა ყველას მოგვდის, მარტო ღმერთია ერთი შეუცდომელი, მაგრამ ხომ შეიძლება პატარა კონფლიქტზე ერთმანეთის გატანა. ხომ გახსოვთ, ბუკნარის თემა მოხდა, იქ რომ ერთი ადამიანი დაღუპულიყო, წარმოიდგინეთ მართლა კატასტროფული რაღაც დატრიალდებოდა. მაგრამ ჩაერია ჭკვიანი ხალხი და მოგვარდა".

"ბირჟაზე" მყოფი სხვა მუსლიმებიც მას ეთანხმებიან და ამბობენ, რომ იქ სადაც რწმენა და სიყვარულია, მტრობის ადგილი არ არის.



Print E-mail
Twitter
სხვა მასალები
საქართველოში კორონავირუსის ე.წ. ბრიტანული, ინდური და სამხრეთ
აფრიკული შტამები გავრცელდა.
13:19 / 02.06.2021
საქართველოში კორონავირუსის ე.წ. ბრიტანული, ინდური და სამხრეთ აფრიკული შტამები გავრცელდა.
ოკუპირებულ ტერიტორიაზე მცხოვრებლებისთვის ცენტრალური ხელისუფლების
მხრიდან
11:22 / 24.05.2021
ოკუპირებულ ტერიტორიაზე მცხოვრებლებისთვის ცენტრალური ხელისუფლების მხრიდან
რა არის კოვიდ-19 -ის ვარიანტები და რა მნიშვნელობა აქვს მის
ცვლილებას ადამიანებისთვის,
10:23 / 24.05.2021
რა არის კოვიდ-19 -ის ვარიანტები და რა მნიშვნელობა აქვს მის ცვლილებას ადამიანებისთვის,
კორონავირუსი

საბჭოთა რეპრესიები

ვიდეო
მესტიას პირველად საფეხბურთო გუნდი ჰყავს - ისტორიული მატჩი [ფოტო/ვიდეო]
შეხვედრის ადგილი რუხის საფეხბურთო აკადემიის ბაზა. 2021 წელი.
რატომ ჰქვია ზუგდიდში ქუჩას ლავრენტი ბერიას სახელი [ვიდეო]
ზუგდიდში ცენტრალურ ქუჩას დღემდე საბჭოთა ტოტალიტარული რეჟიმის ერთ-ერთი ლიდერის, ლავრენტი ბერიას სახელი ჰქვია.
  სიმღერის სიყვარულით - ჩხოროწყუელი ქალების თერაპია [ვიდეო]
პანდემიის პირველი ტალღისას, როცა კორონავირუსზე ბევრი
კერამიკის სახელოსნოს ახალი სიცოცხლე [ვიდეო]
ეს პანოა, რომელზეც ბოლო პერიოდია ვმუშაობ, - სახელოსნოს
ფოტო
 26 მაისი ზუგდიდში [ფოტო]
დამოუკიდებლობის დღეს ზუგდიდში, უკვე მეორე წელია არ იმართება
რეგულაციები კორონავირუსზე და საზოგადოებრივი ტრანსპორტი ზუგდიდში [ფოტორეპორტაჟი]
ტრანსპორტში, მუნიციპალურია ის, თუ კერძო, ისევ პრობლემად რჩება
ოჩოფეხები კოლხეთის ეროვნული პარკიდან [ფოტო]
ოჩოფეხები, რომლებიც კოლხეთის ეროვნული
კორონავირუსის საწინააღმდეგო ვაქცინაცია ზუგდიდში [ფოტო]
საქართველოში კორონავირუსის საწინააღმდეგო ვაქცინაციის
 „ყინულის სამყარო“ სვანეთში
„ყინულის მინი სამყაროში“ ასე დაარქვა საკუთარ ფოტოამბავს
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.