საზოგადოება
მწვადი, ბურგერი, ხაჭაპური და ვინიგრეტი - რა დაუჯდა ბიუჯეტს სასაფლაოებზე პოლიციის მორიგეობა
FaceBook Twitter
E-mail Print
შინაგან საქმეთა სამინისტრომ 2-დან 4 მაისის ჩათვლით, სასაფლაოებთან დანაყოფების მობილიზაცია მოახდინა, პოლიცია მთავრობის დადგენილებით ხელმძღვანელობდა, რომელიც, კორონავირუსის გავრცელების თავიდან აცილების მიზნით, სასაფლაოების ტერიტორიაზე მოქალაქეების შესვლის აკრძალვას გულისხმობდა.

პოლიციელები 3 დღის განმავლობაში მთელი საქართველოს მასშტაბით, ქალაქსა და სოფელში სასაფლაოებთან მისასვლელ გზებს აკონტროლებდნენ, რომ მოქალაქეებისთვის სასაფლაოებზე შესვლის უფლება.არ მიეცათ.

შინაგან საქმეთა სამინისტროს ფეისბუკგვერდზე განთავსებულია ვიდეომასალა, სადაც ქვეყნის სხვადასხვა ქალაქების სასაფლაოდან მორიგე პოლიციელების კადრებია.

"შინაგან საქმეთა სამინისტროს დანაყოფები საქართველოს მთელ ტერიტორიაზე, დილიდან სასაფლაოებთან მისასვლელ გზებსა და დაწესებული რეგულაციების აღსრულების პროცესს ინტენსიურ რეჟიმში აკონტროლებენ. პოლიციის თანამშრომლები არსებული რეგულაციების კონტროლს ახორციელებენ როგორც დედაქალაქში, ისე რეგიონებში არსებულ სასაფლაოებზე.

საქართველოს მთავრობის 2020 წლის 23 მაისის №322 დადგენილების თანახმად, კორონავირუსის გავრცელების თავიდან აცილების მიზნით, მიმდინარე წლის 2 მაისიდან 4 მაისის ჩათვლით, მთელი საქართველოს მასშტაბით, სასაფლაოების ტერიტორიაზე მოქალაქეების შესვლა აიკრძალა. შეზღუდვების დარღვევა ითვალისწინებს სამართალდამრღვევი პირის დაჯარიმებას - 2000 ლარის ოდენობით", - ნათქვამია სამინისტროს მიერ 2 მაისს გამოქვეყნებულ პოსტში, რის ქვეშაც მოქალაქეების ბევრი კომენტარია, ისინი უკმაყოფილებას გამოთქვამენ აღნიშნული შეზღუდვების დაწესების გამო.

მათი აზრით, აღდგომის დღეებში საფლავების მონახულებას არაფერი აქვს საერთო კორონავირუსის გავრცელების საფრთხეებთან.

მოქალაქეთა გარკვეულმა ნაწილმა მაინც მოახერხა ამ დღეს საფლავებზე ჩუმად გასვლა.

60 წლის ალექსანდრეც მათ შორისაა, ვინც აღდგომის მეორე დღეს, აკრძალვის მიუხედავად, დილით ადრე სასაფლაოსკენ გაეშურა.

"ცოლი 10 წლის წინ გარდამეცვალა, მე და ჩემი ქალიშვილი ვცხოვრობთ. მიცვალებულთა მოხსენიების დღეს, ყოველ წელს, ჩემი ძმები, დები, რომლებიც სხვადასხვა ქალაქებში ცხოვრობენ, ოჯახებით ჩამოდიან და საფლავზე ერთად გავდივართ. წელს, ისევე როგორც შარშან ამ შეზღუდვების გამო არ ჩამოსულან. მესმის, რომ ხალხმრავლობა ახლა საშიშია, თუმცა როცა მარტო ვარ, რატომ უნდა იყოს აკრძალული არ მესმის. თუნდაც დავეკავებინეთ, მაინც უნდა წავსულიყავი, სხვანაირად არ შემეძლო.

წინა დღით ყვავილები ვიყიდე და ქალიშვილისთვისაც არ მითქვამს, ისე წავედი დილით ადრე სასაფლაოზე, ცენტრალურ შესასვლელთან პოლიციის 3 მანქანა იდგა, მეც მანქანით ვიყავი, გამოვბრუნდი, მანქანა გზაში დავტოვე და ფეხით, შემოვლითი გზით მაინც შევედი, მხოლოდ რამდენიმე წუთი ვიყავი", - ამბობს ალექსანდრე.

სამეგრელო-ზემო სვანეთში სასაფლაოებთან მორიგეობისთვის 324 პოლიციელი გამოიყვანეს.

სატენდერო დოკუმენტაციებიდან ირკვევა, რომ მათ კვებაზე, 3 დღის განმავლობაში ბიუჯეტიდან 13 ათას 608 ლარი დაიხარჯა, რაც სხვა რეგიონების დეპარტამენტების მიერ დახარჯულ თანხებს აღემატება.

მორიგე პოლიციელთა დღიური ულუფა ასე გამოიყურება:

1 ცალი მჭადი - 60 თეთრი, ყველი 50 გრამი - 1 ლარი, 2 ცალი კვერცხი - 1,2, ვინიგრეტი 0.1 - 1 ლარი, ქათმის ხორცი 1 ულუფა, - 3 ლარი, ლიმონათი 1ცალი - 1.2 , წყალი 1 ცალი - 60 თეთრი, პური 1 ცალი - 1 ლარი. ხაჭაპური - 1 ულუფა 2 ლარი, ფხალი 10 გრამი - 1, 80, აჯიკა 5 გრ - 60 თეთრი.

შედარებით ნაკლები - 233 თანამშრომელი გამოიყვანა ამ დღეს სამცხე - ჯავახეთის პოლიციამ, მათ კვებაზე დახარჯული თანხა 9331.65 ლარია.

კიდევ უფრო ნაკლებია ქვემო ქართლის პოლიციის დეპარტამენტში დახარჯული თანხა - 7324.35 ლარი 253 თანამშრომლისთვის.

კახეთში, სადაც სასაფლაოებთან 810 პოლიციელი გამოიყვანეს, 12 150 ლარი დაიხარჯა.

გურიაში 165 პოლიციელის კვებაზე დაიხარჯა 6534 ლარი, აჭარის პოლიციის დეპარტამენტმა - 9900 ლარი გამოყო 275 თანამშრომლის კვებით უზრუნველყოფაზე.

რეგიონებში მენიუ ერთმანეთისგან იმით განსხვავდება, რომ ზოგან რამდენიმე ღვეზელია სხვადასხვა შიგთავსით, ზოგან კი ბურგერ ბეკონ-დოგი და ქათმის ბარბექიუ. რამდენიმე დეპარტამენტმა შეიძინა პეპსი და შოკოლადიც.

სატენდერო დოკუმენტაციაში არ იძებნება ამ დღისთვის თბილისის პოლიციის დეპარტამენტის, მცხეთა-მთიანეთის, იმერეთის, რაჭა–ლეჩხუმისა და ქვემო სვანეთის პოლიციის და შიდა ქართლის პოლიციის დეპარტამენტების შესყიდვები.

სასაფლაოზე შესვლაზე დაწესებული შეზღუდვის რამდენი დარღვევის ფაქტი გამოვლინდა, ამის შესახებ შსს -ს ინფორმაცია არ გაუვრცელებია, მედიაში გავრცელებული ცნობების მიხედვით, აღდგომის დღესასწაულზე, ქუთაისში, სასაფლაოზე დააკავეს აქტივისტი ნიკა ნარსია, რომელიც მამის და დის სასაფლაოზე ცდილობდა შესვლას.

აჭარაში, აკრძალვის წესის დარღვევვის გამო, დააკავეს "ერთიანი ნაციონალური მოძრაობის" ბათუმის ორგანიზაციის წევრი, ელგუჯა ბაგრატიონი.

ასევე, ვარკეთილში, ე.წ დამპალოს სასაფლაოზე შესვლის მცდელობისთვის მოქალაქე ბექა პაპაშვილი დააკავეს. მას ბაბუის საფლავზე შესვლა სურდა, თუმცა, პოლიციამ ამის უფლება არ მისცა. მოქალაქემ ეს გააპროტესტა - პოლიციას ეუბნებოდა, რომ შესვლის უფლება მიეცათ და 2000-ლარიანი ჯარიმა გამოეწერათ. ინციდენტს მისი დაკავება მოჰყვა.

სულ რამდენი დაიხარჯა მთელი საქართველოს მასშტაბით სასაფლაოებთან მორიგეობის დროს პოლიციელთა კვებაზე, ამ ინფორმაციის მოთხოვნით, შინაგან საქმეთა სამინისტროს მივმართეთ, უწყებამ წერილზე გვიპასუხა, თუმცა მოგვწერა, რომ ასეთ ინფორმაციას არ ფლობს.

ატვირთულ ტენდერებში მითითებულ თანხას თუ დავაჯამებთ, გამოდის, რომ რეგიონებში სასაფლაოებთან მორიგე პოლიციელთა კვებაზე 58 ათას 848 ლარი დაიხარჯა.

Print E-mail
Twitter
სხვა მასალები
ზუგდიდში, თამარ მეფის ქუჩაზე თუ ერთხელ მაინც გაივლით,
11:00 / 21.09.2021
ზუგდიდში, თამარ მეფის ქუჩაზე თუ ერთხელ მაინც გაივლით,
ახალი სასწავლო წელი, საქართველოს მასშტაბით მოქმედ
სკოლებში ისევ დისტანციურად
10:16 / 02.09.2021
ახალი სასწავლო წელი, საქართველოს მასშტაბით მოქმედ სკოლებში ისევ დისტანციურად
ეროვნულ-დემოკრატიული ინსტიტუტის NDI-ის მიერ ჩატარებული კვლევის
მიხედვით,
16:06 / 01.09.2021
ეროვნულ-დემოკრატიული ინსტიტუტის NDI-ის მიერ ჩატარებული კვლევის მიხედვით,
კორონავირუსი

საბჭოთა რეპრესიები

ვიდეო
Life in exile during the pandemic [Documentary film]

In the village Rukhi in Zugdidi municipality, nine internally displaced

„არ ყოფილა საშიში“ - ვაქცინაცია სოფლის ამბულატორიაში [ვიდეო]
74 წლის ზაურ ჯიქია დროებით მოწყდა თხილნარში მოსავლის
ფოტო
ვაქცინაცია ავტობუსში [ფოტო]
ზუგდიდის მუნიციპალიტეტის სოფლებსა და ქალაქში მცხოვრებ მოქალაქეებს
„გვიხარია, რომ მოქალაქეები აქტიურობენ“ - ვაქცინაცია ზუგდიდში [ფოტო]
მოქალაქეთა საყოველთაო ვაქცინაცია ზუგდიდში გრძელდება.
"აქტიურობა მაღალია" - ზუგდიდში "ფაიზერით" ვაქცინაცია დაიწყო [ფოტო]
კორონავირუსის საწინააღმდეგო ამერიკული წარმოების "ფაიზერით"
3 თვე კოვიდტესტირების რეჟიმში - ფოტორეპორტაჟი ენგურის ხიდიდან
აფხაზეთ-სამეგრელოს საოკუპაციო ხაზთან, ენგურის ხიდზე,
 26 მაისი ზუგდიდში [ფოტო]
დამოუკიდებლობის დღეს ზუგდიდში, უკვე მეორე წელია არ იმართება
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.