აკენწვლის ოსტატი გოგონა ზუგდიდიდან [ვიდეო/ფოტო]
ფეხბურთისადმი მისი სიყვარული ღრმა ბავშვობიდან დაიწყო. თითქმის იმ დროიდან, ფეხი როცა აიდგა. როგორ ათამაშებდა ბურთს უცნობი სპორტსმენი, თვალი კადრებს ინტერნეტსივრცეში მოჰკრა. მიმბაძველობის სურვილი გაუჩნდა და გამოუვიდა კიდეც. პირველი მცდელობა არც თუ ურიგო გამოდგა - 21-ჯერ აკენწლა. მას შემდეგ აზარტმა სძლია და საკუთარ თავზე მუშაობაც ყველასგან დამოუკიდებლად დაიწყო. თავისუფალ დროს ძირითადად ფეხბურთს უთმობს, თუმცა გულგრილი არც სპორტის სხვა სახეობებისადმი რჩება. ამბობს, რომ კალათბურთი, ჩოგბურთი და ხელბურთი თითქმის იგივე წარმატებით გამოსდის.
„ჩემით ვისწავლე, თანდათან ვსწავლობდი. მაქსიმუმ 82 ამიკენწლავს, ისე, რომ არ გამვარდნია. ფეხბურთს ვთამაშობ ჩემს თანატოლ გოგო-ბიჭებთან. ჩემს ძმასთანაც. შაბათ-კვირას ძირითადად ფეხბურთს ვუთმობ. მანამდე გაკვეთილებს ვსწავლობ“, - უთხრა „ლაივპრესს“ ლიკა კემულარიამ.
როცა სტადიონზეა, კარებში კი არ დგას, როგორც ბევრი გოგო, თავდამსხმელია და გოლების გატანაც კარგად გამოსდის. ამაში ჩვენც დავრწმუნდით.
მისი საყვარელი ფეხბურთელი კრიშტიანუ რონალდოა. მასწავლებლებმა, მეზობლებმა და თანაკლასელებმა დიდი ხანია იციან მეექვსეკლასელი გოგონას გატაცების შესახებ. ზოგჯერ ბიჭებს შურთო ჩემი, - ხუმრობით ამბობს.
ლიკას სპორტულ მისწრაფებებს ოჯახში გულშემატკივრობენ. დედა, ნატო სართანია იხსენებს, რომ ბურთის მიმართ სიყვარული პატარა გოგონამ ჯერ კიდევ ორი წლის ასაკიდან გამოამჟღავნა. არ დაუშლიათ, პირიქით. სწავლის და მუსიკის შემდეგ, თავისუფალ დროს ძირითადად სწორედ ფეხბურთს უთმობს. სპორტზე ინფორმაციებსაც აქტიურად იძიებს. პატარა ძმაც ამ ყველაფერში აქტიურად მონაწილეობს. ერთი სიტყვით, ერთ-ერთი მთავარი თემა ოჯახში განტვირთვისას, ფეხბურთია.
„ვნახოთ პროფესიად რას აირჩევს. ჯერ არ გადაუწყვეტია“, - გვითხრა ნატო სართანიამ.
მომავლის გეგმებზე დღეს ლიკა ვერ საუბრობს. მოსაფიქრებლად გოგონას დრო ბევრი აქვს. სპორტის გარდა ძალიან უყვარს მუსიკა. ფორტეპიანოზე შვიდი წლიდან უკრავს. არის რამდენიმე საერთაშორისო კონკურსის ლაურეატიც.