სტიქიამ სამეგრელო-ზემო სვანეთის ცალკეულ მუნიციპალიტეტებში პრობლემები ელექტროენერგიის კუთხითაც შექმნა. განსაკუთრებით რთული ვითარებაა მარტვილში. მუნიციპალიტეტს შუქი არ მიეწოდება.

"ენერგო-პრო ჯორჯიას" დასავლეთ საქართველოს რეგიონლური ფილიალის საზოგადოებასთან ურთიერთობის სამსახურის წარმომადგენელმა ეკა ურიდიამ "ლაივპრესს" უთხრა, რომ უხვი ნალექის შედეგად ადიდებულმა მდინარე ტეხურამ წააქცია მაღალი ძაბვის 35 კილოვოლტიანი ელექტროგადამცემი წყემის ანძა, რომლითაც მარტვილის მუნიციპალიტეტი მარაგდებოდა.

კომპანიაში განმარტავენ, რომ ტექნიკური ბრიგადები მობილიზებულები არიან ადგილზე და ცდილობენ მაქსიმალურად შემჭიდროებულ ვადებში აღადგინონ დაზიანება. თუმცა, სამუშაოს მოცულობის და გართულებული გარემო-პირობების მიზეზით, ელექტროენერგიის აღდგენის სავარაუდო დროის დასახელება უჭირთ.

მარტვილის გარდა, ძლიერმა წვიმამ პრობლემები შექმნა წალენჯიხის და ზუდიდის სოფლების ნაწილშიც. მცირე დაზიანებების გამო, ელექტროენერგია წალენჯიხის სოფელ მიქავას და ზუმის და ზუგდიდის სამი სოფლის ნაწილს არ მიეწოდება.

"ენერგო-პრო ჯორჯიას" ინფორმაციით, აქ სამუშაოები ინტენსიურად მიმდინარეობს და აბონენტებს ელექტროენერგიის მიწოდება უმოკლედ დროში აღუდგებათ.

სტიქიამ სამეგრელოს ცალკეულ მუნიციპალიტეტებში პრობლემები შექმნა. დაიტბორა ეზოები, სახლების სარდაფები, გზები. დაიმეწყრა ტერიტორიები. კომისიები ზარალის ოდენობას ამ დრომდე სწავლობენ.