ზუგდიდში, უეფას მე-3 კატეგორიის სტანდარტის სტადიონის მშენებლობის პირველი ეტაპი მიმდინარეობს, რომელიც მინდვრის ბუნებრივი საფარით მოწყობას და აღმოსავლეთის და დასავლეთის ტრიბუნების აშენებას გულისხმობს.

მშენებლობის პირველი ეტაპი მომავალი წლის სექტემბერში დასრულდება და უკვე თამაშების გამართვის შესაძლებლობაც იქნება, - უთხრა „ლაივპრესს“ ქალაქ ზუგდიდის მერმა ირაკლი გოგოხიამ.

„სამუდამოდ უნდა დასრულდეს სათამაშო მოედნების პრობლემა ზუგდიდში, შეიძლება ყველა ვერ დადგეს წარმატებული სპორტსმენი, მაგრამ თანამედროვე სტანდარტებით აშენებული სპორტული ინფრასტრუქტურა ხელს შეუწყობს ახალგაზრდებში ჯანსაღი ცხოვრების წესის დამკვიდრებას“, - განაცხადა მერმა.

ირაკლი გოგოხიას განცხადებით, მეორე ეტაპისთვის, დაგეგმილია ჩრდილოეთის და სამხრეთის ტრიბუნების მოწყობა და სათადარიგო მოედნის მშენებლობა.

პროექტის თანახმად, სტადიონს ექნება მაყურებელთა 10 შესასვლელი, ასევე სახანძრო და სასწრაფო დახმარების მანქანების მისასვლელები. დასავლეთ ტრიბუნასთან განთავსდება ავტობუსის პარკინგი გუნდების, ქომაგების და მედიისთვის. ტრიბუნების ქვეშ განლაგდება მაღაზიები, კვების ობიექტები, გუნდების ოთახები, საშხაპეები, მსაჯების ოთახები.

ირაკლი გოგოხიამ „ლაივპრესს“ უთხრა, რომ სტადიონის მშენებლობის პარალელურად, მერია ენგურქაღალდკომბინატის ინფრასტრუქურის კეთილმოწყობაზე მუშაობს. მისივე სიტყვებით, თამაშების გამართვისას ამ მიმართულებით მოძრავი მუნიციპალური ტრანსპორტი მაყურებლებისთვის კომფორტული გახდება.

საბოლოოდ სტადიონის კომპლექსის მშენებლობა 2017 წლის ბოლოს დასრულდება. მისი ღირებულება 20 მილიონი ლარია. სტადიონს კომპანია „დაგი“ აშენებს.