ზუგდიდელი ილია გაბრავა 6 წლისაა და უკვე მეორე წელია შოტოკან კარატეში ვარჯიშობს. ამ დროში მან ათამდე სერთიფიკატი და ჯილდო მოიპოვა შიდა თუ საერთაშორისო დონის შეჯიბრებებში. ჯერ კიდევ ორი წლის იყო, როცა სპორტის ამ სახეობით დაინტერესდა, თუმცა პატარა ასაკის გამო მას სპეციალისტებმა ვარჯიშის დაწყება არ ურჩიეს.

ახლა ილია წარმატებულ მოსწავლედ ითვლება, რამდენიმე დღეში კი თბილისში ჩავა, სადაც პრეზიდენტის თასის მოსაპოვებლად, კარატეს სხვადასხვა სახეობაში საერთაშორისო დონის ჩემპიონატი იმართება. ქვეყნის მასშტაბით სპორტსმენების პარალელურად მასში მონაწილეობას მიიღებენ მეზობელი ქვეყნებიდან ჩამოსულები, მათ შორის აზერბაიჯანიდან და სომხეთიდან.

ილია იმ ხუთ ზუგდიდელ სპორტსმენს შორის მოხვდა, რომლებიც აპრილში შოტოკან კარატეში მსოფლიო ჩემპიონატში მიიღებენ მონაწილეობას. შეჯიბრი აპრილის თვეში სტამბოლში გაიმართება.

6 წლის სპორტსმენს ზუგდიდელი მწვრთნელი ცეზარ ჯანჯღავა ჯგუფური ვარჯიშების პარალელურად გახანგრძლივებულად ამეცადინებს რამდენიმე მოსწავლესთან ერთად. მწვრთნელობის 15 წლიანი გამოცდილების მქონე ცეზარ ჯანჯღავა ამბობს, რომ ილიას დიდი პოტენციალი აქვს, მთავარია კარატე მისთვის მხოლოდ ბავშვურ გატაცებად არ დარჩეს და განვითარებაზე იფიქროს. მწვრთნელის თქმით, დიდი შრომის შემთხვევაში ილიას საქართველოს ნაკრებში მოხვედრის და შემდეგ სხვა სიმაღლეების დაპყრობის შესაძლებლობა აქვს.

6 წლის კარატისტი დათმობაზე არც ფიქრობს. ამბობს, რომ სპორტი მისთვის უმთავრესია და მეტოქესთან ორთაბრძოლისას მხოლოდ გამარჯვებაზე ფიქრობს.

მიუხედავად იმისა, რომ სკოლის შემდეგ დამატებით რამდენიმე საათიანი ფიზიკური დატვირთვა უწევს, არ წუწუნებს. როგორც ილიას დედა, ხათუნა მირცხულავა ამბობს, ვარჯიშებიდან სახლში დაბრუნებული ისევ კარატის ილეთებს იმეორებს და წარმატებულის პორტსმენების ვიდეოკადრების ყურებისას მათი მოძრაობების განმეორებას ცდილობს.