მეგრული ენის დღე უცვლელი მოთხოვნებით [ვიდეო]
„არსებობდა მეფის დროინდელი რუსეთი. არსებობდა საბჭოთა იმპერია. მეფის დროინდელ და კომუნისტურ რუსეთშიც რომელ ენებს არ ქონდათ თავისუფლად განვითარების საშუალება? ისევ მეგრულ და სვანურ ენებს. გამოდის, რომ რუსეთს კი არა, ეს უპირველეს ყოვლისა, აწყობდა ადგილობრივ ხელისუფლებას. დაგვანახონ რა აწყობს საქართველოს პოლიტიკურ ცენტრს, თორემ რუსეთს რა აწყობს, ეს არ არის ჩვენი საქმე, ან ამერიკას, ან ევროკავშირს. ისინი ჩვენს მაგივრად გადაწყვეტილებებს ვერ მიიღებენ“, - განაცხადა ზურაბ კვარაცხელიამ „ლაივპრესის“ კითხვის საპასუხოდ, რომ ხშირად საზოგადოების ნაწილი მსგავს აქტივობებს სეპარატიზმის გამოვლინებად აღიქვამს.
ორგანიზაციის ხელმძღვანელის თქმით, ისინი არ ეძებენ პრობლემის გადაწყვეტის გზებს სხვაგან, რადგან ეს თბილისის პრეროგატივაა.
შეხვედრის დიდი ნაწილი მეგრულ ენაზე წარიმართა. შესრულდა ლექსები და სიმღერებიც ამ ენაზე.
ღონისძიებას ზუგდიდის საკრებულოს თავმჯდომარის მოადგილე თაზო ფაცაციაც ესწრებოდა. ის ზურაბ კვარაცხელიასგან განსხვავებით ფიქრობს, რომ მეგრულს გაქრობის საფრთხე არ ემუქრება.
„მე შეიძლება ამასთან დაკავშირებით მქონდეს ჩემი აზრი. სანამ სამეგრელო იქნება, სანამ მეგრელი კაცი იარსებებს, ვფიქრობ მეგრული ენა და მეგრული ნანა არ გაქრება. რაც დრო გადის, სამეგრელოც მრავლდება, ქალაქიც მსხვილდება და მგონია, რომ უფრო ვითარდება. არ მგონია გაქრობისკენ წავიდეს“, - აღნიშნა მან.
თაზო ფაცაციასვე თქმით, თუკი საზოგადოება შეთანხმდება, რომ საკითხს საკანონმდებლო განხილვა სჭირდება და დაცვა და პარლამენტს პეტიციით მიმართავენ, ამ შემთხვევაში საკანონმდებლო ორგანო იმსჯელებს წინადადებაზე და შესაბამის დასკვნას დადებს.
შეხვედრაზე აღინიშნა, რომ აუცილებელია ენის შესანარჩუნებლად ოჯახებში ბავშვებს მეგრულად ესაუბრონ.
მეგრული ენის დღე ზუგდიდსა თუ სამეგრელოს სხვა მუნიციპალიტეტებში 2013 წლიდან აღინიშნება. 29 მაისი - ეს თარიღი საგანგებოდ შეირჩა, ენათმეცნიერ მამანტი ძაძამიას დაბადების დღესთან დაკავშირებით.
ზუგდიდში მეგრულის დაცვის მოთხოვნით საპროტესტო აქციები რამდენჯერმე გაიმართა.