ზუგდიდის ბულვარის მიმდებარედ დღეს ახალგაზრდებმა მავთულხლართები გააბეს, სადაც გამოფინეს ინფორმაცია საბჭოთა რეჟიმის მიერ დახვრეტილი ადამიანების შესახებ, ცნობები რუსეთის მიერ სხვადასხვა წლებში საქართველოს ოკუპაციაზე, ფოტოები, რომელიც ასახავს აფხაზეთის და აგვისტოს ომს. ქუჩაში მოწყობილი საგამოფენო სივრცე გაიხსნა წარწერით, „რუსული ოკუპაციის ჩიხი“ რომელიც, სიმბოლურად როგორც „ჩიხიდან“ გამოსავალი, დასრულდა საქართველოსა და ევროკავშირის დროშების ფონზე დაკიდული ბანერით „ძალა ევროპაშია“.

რუსული ოკუპაციის წინააღმდეგ მიმართულ აქციაზე ძირითადად ახალგაზრდა დამთვალიერებელი მივიდა. იყვნენ საწინააღმდეგო მოსაზრების მქონე მოქალაქებიც, რომლებმაც უკმაყოფილება ადგილზე დააფიქსირეს. ორმა მათგანმა აღნიშნა, რომ დროა დასრულდეს „რუსეთზე როგორც ოკუპანზე“ საუბარი. მათ უკმაყოფილება გამოთქვეს იმის გამოც, რომ ბულვარის მიმდებარედ გზა იყო დილიდან ჩაკეტილი.

აქცია - „რუსული ოკუპაცია და საქართველოს ევროპული არჩევანი“ კამპანია „ძალა ევროპაშია“ ფარგლებში, „საერთაშორისო გამჭვირვალობა-საქართველოს“ სამოქალაქო საბჭოს წევრებისა და სამოქალაქო აქტივისტების ინიციატივით გაიმართა.