ზუგდიდელმა მოზარდმა უძველესი კოლხური საკრავი აღადგინა [ვიდეო]
მუსიკოსი მოწიწებით იღებს საკრავებს, მის ისტორიას და დამზადების ტექნიკას გვიყვება. საკრავები სხვადასხვაგვარია, სიმებიანი, ხემებიანი, ჩასაბერი. დიტოსთვის ყველა ერთნაირად საინტერესოა, რადგან ისინი საქართველოს სხვადასხვა კუთხის ხასიათს, კულტურას და ისტორიას გადმოსცემენ.
მათ შორის ერთ-ერთი, კოლხური ლარჭემი დიმიტრის დამზადებულია.
„ეს უძველესი კოლხური საკრავია. ის დამზადებულია კოლხური ლერწმისგან, რომელიც გავრცელებულია დასავლეთ საქართველოსა და აფხაზეთში. მის შესახებ ბიბლიოთეკებში ისტორიული მასალები მოვიძიე, სადაც შევიტყვე ლარჭემის დამზადების წესი, შევადგინე საკრავის აღწერილობა და მისი დამზადება ვთხოვე ცნობილ ოსტატს ჩხოროწყუში, დემურ ანთიას, შემდეგ კი მე თვითონ დამოუკიდებლად გავაკეთე ეს საკრავი“, - გვითხრა დიმიტრიმ.
ლარჭემი მწყემსების საკრავი ყოფილა.
„ეს არ იყო საორკესტრო საკრავი. როცა მწყემსებს ნახირი გაჰყავდათ, ისინი გარკვეულ მელოდიას უკრავდნენ, შინ დაბრუნებისას სხვას და ამას პირუტყვი იმახსოვრებდა და ზედმეტი ძალისხმევის გარეშე შესაძლებელი იყო დიდი ნახირის მწყემსვა. ამბობენ, რომ ჩვენთან საუკუნეების წინ გლეხი ისე არ წავიდოდა ბაზარში, ლარჭემი ხელისთვის არ გამოეყოლებინაო, ახლა კი დასანანია, რომ მასზე ალბათ საქართველოში ალბათ სულ 5 ადამიანი თუ უკრავს“, - ამბობს დიმიტრი.
მან ჩაბერვამდე ლარჭემი წყლით სავსე ჯამში ჩადო, უფრო სუფთა ბგერების მისაღებად. ეს წესიც ლიტერატურულ წყაროებში ამოიკითხა.
ისტორიული ლიტერატურის მოძიების გარდა, დიმიტრი ბევრს მეცადინეობს. მე-12 კლასშია. აპირებს ექიმი გახდეს, თუმცა ამბობს, რომ ხალხური საკრავები „მისი ცხოვრების მეგზურები ბოლომდე იქნებიან“.
დიმიტრი თავის თანატოლებსაც ასწავლის დაკვრას. ხალხური საკრავების პოპულარიზაციის მიზნით, ჩხოროწყუში გამართულ აგროტურისტულ ფესტივალშიც მიიღო მონაწილეობა, სადაც ოსტატ დემურ ანთიასთან ერთად ძველი საკრავები გამოფინა.