ზუგდიდელმა სპორტსმენმა 8 კილომეტრი ჩამუხლვით გაიარა [ვიდეო]
„სამყაროს შეცნობისა და შეგრძნობის უამრავი კარგი გზა არსებობს. ადრე დაინტერესებული ვიყავი სირბილით, ვმუშაობდი რუხის სავაჭრო ცენტრში და კომბინატის დასახლებიდან, სახლიდან ყოველ დილა-საღამოს ამ მანძილს სირბილით გავდიოდი, შემდეგ თიაქარი აღმომაჩნდა და სირბილი შევწყვიტე. შემდეგ ნელ-ნელა ჩაჯდომებში დავიწყე ვარჯიში და მანძილს ნელ-ნელა მოვუმატე“, - გვითხრა ბაჩანა ოყუჯავამ.
მან აქამდე არაერთი შორი მანძილი დაფარა ფეხით. გასულ წელს კი ანაკლიიდან უშგულამდე ფეხით ავიდა.
„ზოგადად, როცა მიზნად დავისახავ ამა თუ იმ მანძილის გავლას, არასდროს არ ვარ ბოლომდე დარწმუნებული, რომ შევძლებ სირთულეების გადალახვას. მაგრამ ყოველთვის მინდა გამოვცადო ჩემი შესაძლებლობები. ახლაც არ ვიყავი დარწმუნებული, რომ გადავლახავდი, მაგრამ შევძელი. თუ ჩემი ამბავი ვინმეს დააფიქრებს და საკუთარი შესაძლებლობების რწმენას მისცემს, ბედნიერი ვიქნები. მინდა ახალგაზრდებმა დრო ფუჭად არ დაკარგონ და ჯანსაღი ცხოვრების წესს მისდიონ “, - ამბობს ახალგაზრდა.
სპორტსმენმა გვითხრა, რომ გასულ წელს, საქართველოს ფეხით შემოვლას აპირებდა, რაშიც ფინანსური დახმარება ზუგდიდის მერიას სთხოვა, თუმცა მათგან მხოლოდ დაპირება მიიღო. სპორტსმენთან ერთად დღეს მხოლოდ მისი ერთი მეგობარი იმყოფებოდა.
ბაჩანა ოყუჯავა გეგმავს ველოსიპედით ჯერ საქართველოში, შემდეგ კი ევროპაში იმოგზაუროს.