თეატრის დასმა, რომელიც არაპროფესიონალი მსახიობებისგან არის შექმნილი, დღეს წარმოადგინა 42 წლის ქალის რეალური ისტორია, რომელიც ქმარს გაცილებულია, ჰყავს ორი შვილი. მისი ვაჟი დედის მეორედ გათხოვების წინააღმდეგია.

სიუჟეტის განვითარებისას, აუდიტორია ინტერაქტიული იყო.

მაყურებლების თქმით, ქალი მეორედ გათხოვებისას ხშირად საზოგადოების მხრიდან დიდ ზეწოლას განიცდის და ის ფსიქოლოგიური წნეხის მსხვერპლი ხდება.

თეატრის პროექტის ხელმძღვანელის, სამოქალაქო აქტივობისა და თანასწორობის ცენტრის ხელმძღვანელ ციცინო შენგელიას თქმით, სიუჟეტის გმირმა საზოგადოებისგან მიიღო მესიჯი, რომ მას სჭირდება გაძლიერება.

„ჩვენ შევეხეთ ისეთ მტკივნეულ თემას, როგორიცაა ქალის ცხოვრების თავიდან დაწყების შესაძლებლობა და უფლება. ჩვენ ვისაუბრეთ იმაზე, თუ რამდენად ხშირად კიცხავს, აქილიკებს საზოგადოება ასეთ ქალებს. წარმოდგენაში მონაწილეობა მიიღეს ქალებმა, რომლებთაც დაუგროვდათ ცხოვრებისეული გამოცდილება. მათ არ აქვთ სამსახიობო უნარები, თუმცა მათ დღეს საზოგადოებას თამამად და ღიად უთხრეს თავისი სათქმელი“, - გვითხრა ციცინო შენგელიამ.

ჩაგრულთა, იგივე ფორუმის თეატრი მსოფლიოში გამოიყენება, დიალოგის, მშვიდობის მშენებლობისა და არაძალადობრივი წინააღმდეგობისთვის.