სენაკელ ახალგაზრდებს ოცნებები „ფიროსმანმა“ აუსრულა [ვიდეო/ფოტო]
მათ ვერ წარმოუდგენიათ, როგორი იქნებოდა ცხოვრება სცენის გარეშე.
რომ არა თეატრი, ერთი რიგითი მოქალაქე ვიქნებოდი, - ამბობს 20 წლის თამარი.
მოზარდების ოცნებები სენაკის მოსწავლე-ახალგაზრდობის კულტურის ცენტრში ახდა, სადაც 6 წლის წინ ახალგაზრდული თეატრი „ფიროსმანი“ ჩამოყალიბდა.
დასში ყველაზე პატარა მსახიობი 5 წლისაა, უფროსი კი 20-ის.
„ყველა მაგარია და ყველა ნიჭიერია“, - ამბობს ახალგაზრდა მსახიობებზე თეატრის სამხატვრო ხელმძღვანელი ვეფხვია გორგოძე.
„ფიროსმანი“ ყველასთვის ხელმისაწვდომია. უფასოა. დასში სხვადასხვა ასაკის 50-მდე ბავშვია გაერთიანებული.
„პირველი სპექტაკლი 5 ბავშვით დავდგით, მერე გასვლები მოვაწყვეთ სკოლებში. ნელ-ნელა მოვიდნენ ბავშვები, მათ შორის სოფლებიდანაც. თეატრის შექმნის იდეა მუნიციპალიტეტის იყო. ბავშვებთან მუშაობის პროცესი რთულია, მაგრამ ძალიან საინტერესო. დარწმუნებული ვარ, რომ ისინი კულტურის მოყვარულები გაიზრდებიან“, - ამბობს სამხატვრო ხელმძღვანელი.
„ფიროსმანის“ რეპერტუარი მრავალფეროვანია. დასი მუშაობს როგორც კლასიკურ ლიტერატურაზე, ისე თანამედროვე ავტორების სცენარებზე და საბავშვო ზღაპრებზე. აცოცხლებენ ძველ ქართულ კინოფილმებსაც.
ახალგაზრდებმა რამდენიმე დღის წინ სცენაზე „შერეკილები“ ითამაშეს.
მოზარდები ამბობენ, რომ ხშირად უფროსები მათ საქმიანობას არასერიოზულად უდგებიან, ყოველდღიური შრომით და სწავლით კი უნდათ დაამტკიცონ, რომ მსახიობობა ერთ-ერთი საუკეთესო პროფესიაა.