სიყვარულის თაიგული ირინას სახელოსნოდან [ვიდეოგაკვეთილი]
არ გეგონოთ, რომ მეგობრის გახარება მხოლოდ ძვირფასი ნივთებით არის შესაძლებელი.
თქვენი ხელით შექმნილი ორიგინალური და ექსკლუზიური საჩუქარი, ადამიანს ვისაც უყვარხართ, ყველაზე მეტად გაახარებს.
ნუ შეშინდებით და არ გეგონოთ, რომ ლამაზ ნივთებს მხოლოდ ხელოვანები ქმნიან. ეს ნებისმიერი პროფესიის ადამიანს შეუძლია. მთავარია რამდენიმე კრიტერიუმს აკმაყოფილებდეთ: იყოთ შეყვარებული, მონდომებული და მომთმენი.
ირინა მიქავამ საკუთარ სახელოსნოში „ლაივპრესს“ დაუმზადა გულებით და ყვავილებით აკინძული „სიყვარულის თაიგული“. მასალისთვის მან მხოლოდ 5 ლარი დახარჯა და თაიგულიც რამდენიმე საათში დაამზადა.
მაშ ასე, დავიწყოთ: მყარი ფერადი ქაღალდებისგან, ან ნაჭრებისგან გამოვჭრათ გულები, ყვავილები, დათუნიები, მოკლედ ის, რაც თქვენ მოგწონთ და სამუშაოდ გიმარტივდებათ.
გამოჭრილ, ორ ერთნაირ ფიგურას კიდეებზე წავუსვათ წებო, ავკინძოთ ისე, რომ შუაში სივრცე დარჩეს. მას შემდეგ, რაც წებო გაშრება, იმისთვის, რომ ფუმფულა გულები გამოვიდეს, ცარიელი სივრცე შევავსოთ ერთჯერადი ხელსახოცით.
გამზადებული ფიგურა ასევე წებოს დახმარებით წამოვაცვათ ხის ჩხირებზე. ამავე მეთოდით შეძლებთ ყვავილების აწყობას.
უკვე დამზადებული ფიგურები შეგვიძლია ჩავაწყოთ კალათაში, რომლის ხის ჩხირებით და წებოს გამოყენებით აკინძვა ასევე ძალიან მარტივია.
თაიგულში შეგიძლიათ ღია ბარათი ჩადოთ და დაწეროთ, რომ ესაჩუქარი დამზადდა თქვენი ხელით, და დიდი სიყვარულით.