ზუგდიდის ბოტანიკურ ბაღში 3000 ძირი დეკორატიული მცენარე მოიტანეს, რომლის დარგვის პროცესიც უახლოეს დღეებში დაიწყება. ბოტანიკური ბაღების მართვის ცენტრის დირექტორ ზვიად ქარჩავას განცხადებით, ხე-მცენარეები ეტაპობრივად კიდევ დაემატება.

ამ დროისთვის ბოტანიკურ ბაღში კეთდება შიდა ბილიკები. საერთო ჯამში, სხვადასხვა ლოკაციაზე 8 კილომეტრის სიგრძის ბილიკზეა საუბარი.

უახლოეს დღეებში იგეგმება სკამებისა და ნაგვის ურნების განთავსებაც. ბაღს ექნება ორი შესასვლელი, როგორ ადრე ჰქონდა, თუმცა სხვადასხვა ტექნიკური სამუშაოსთვის ტრანსპორტის გასატარებლად დაემატა მესამე კარი ლაღიძის ქუჩიდან.

ბილიკების მოწყობის პარალელურად, მიმდინარეობს ხელოვნური ტბების ქვით მოპირკეთება და ადმინისტრაციული შენობის მშენებლობა.

ზვიად ქარჩავას განცხადებით, ბაღში სამუშაოები ივნისში დასრულდება. ჯერ არ არის გადაწყვეტილი, რა ეღირება შესვლა. ამ საკითხზე ადმინისტრაცია საჯარო შეხვედრის მოწყობას გეგმავს.

ეკატერინე ჭავჭავაძის მიერ XIX საუკუნეში გაშენებული ზუგდიდის ბოტანიკური ბაღის აღდგენის სამუშაოები ერთი წელია მიმდინარეობს. ბაღი, რომელიც მოუვლელობის გამო განადგურებული იყო, ეკალბარდებისგან და გამხმარი მცენარეებისგან გაიწმინდა.

დასრულდა მიწისქვეშა კომუნიკაციების მოწყობა - დამონტაჟებულია სარწყავი, სანიაღვრე და საკანალიზაციო სისტემები. გაყვანილია ელექტროსადენები და ბუნებრივი აირი. აშენდა 3 საპირფარეშო, 2 სალარო ჯიხური; დასრულდა მებაღის სახლის და ორანჟერეას მშენებლობაც.

ზუგდიდის ბოტანიკური ბაღის რეკონსტრუქცია მრავალწლიანი დაპირებების შემდეგ 2018 წლის თებერვალში დაიწყო. ბაღის აღდგენის სამუშაოებს საქართველოს მუნიციპალური განვითარების ფონდი ახორციელებს. პროექტს მსოფლიო ბანკი ადგილობრივი ბიუჯეტის თანამონაწილეობით აფინანსებს. მისი საერთო ღირებულება 12 მილიონი ლარია.