არჩევნები დასრულდა და ქალაქი ნელ-ნელა უბრუნდება ჩვეულ რიტმს. დღემდე საზოგადოებრივი თავშეყრის ადგილებში კენჭისყრის შედეგები საუბრის მთავარ თემად რჩება. ამომრჩეველთა ნაწილი კმაყოფილი და გახარებულია მმართველი პარტიის გამარჯვებით, გაერთიანებული ოპოზიციის მხარდამჭერები კი ამბობენ, რომ არჩევნები გაყალბდა.

ზუგდიდის ქუჩებში მოქალაქეებს ვთხოვეთ შეეფასებინათ არჩევნების პოლიტიკური და ეკონომიკური ნაწილი, მათ რა მოიგეს. გამოკითხულთა უმრავლესობა თანხმდება, რომ მერის რიგგარეშე არჩევნები უხვსტუმრიანი იყო, რითაც მოსახლეობის ნაწილმა ეკონომიკურად იხეირა.

წინასაარჩევნო პერიოდში პოლიტიკოსების მხრიდან გამაფრთხილებელი განცხადებების ფონზე, ზუგდიდის მერის რიგგარეშე არჩევნები ქვეყნის ყურადღების ცენტრში მოექცა. საქართველოში მოქმედი მედიასაშუალებების არაერთი ჯგუფი მუშაობდა ზუგდიდში. ყველა უბანთან მობილიზებული იყო პოლიცია. სხვადასხვა რეგიონიდან ჩამოსული იყვნენ პარტიების მხარდამჭერები და დამკვირვებლები. შედეგად, 19 მაისის კვირაში დაჯავშნილი იყო ქალაქის ყველა დიდი თუ პატარა საოჯახო სასტუმრო.