ზუგდიდში გამართულ კოლხური ღვინის ფესტივალზე ერთი კუთხე აფხაზეთსაც დაეთმო. აქ ოკუპირებული ტერიტორიიდან გადმოტანილი ალკოჰოლური სასმელები - არაყი, სხვადასხვა სახეობის ღვინო იყო წარმოდგენილი. ასევე, გამოიფინა აფხაზური ჩაი და აჯიკა, ჯემები, თაფლი, კომპოტები, ჩურჩხელა და ჩირები.

ამას გარდა, გაიშალა ტრადიციული აფხაზური სუფრა. დაიდგა აფხაზური ფაცხაც.

აფხაზეთის ავტონომიური რესპუბლიკის სავაჭრო-სამრეწველო პალატის დირექტორმა გოგიტა თედორაძემ "ლაივპრესს" განუცხადა, რომ ეს პროდუქცია მათ საჩუქრად აფხაზეთიდან მიიღეს.

"ჩვენ გვაქვს შერიგების პოლიტიკის მიმართულება. შესაბამისად, გვაქვს მათი ღვინოც წარმოდგენილი. ერთგვარი სიმბოლური, მშვიდობისკენ გადადგმული ნაბიჯი", - აღნიშნა გოგიტა თედორაძემ.

ზუგდიდმა 24 ნოემბერს კოლხური ღვინის ფესტივალს უმასპინძლა. ღონისძიების ფარგლებში კოლხური ღვინის ჯიშებისგან დამზადებული ნაწარმი გამოიფინა.

მოეწყო ყველის მივიწყებული სახეობების და სხვადასხვა სასოფლო პროდუქციის სივრცეებიც.