სოხუმელი ეკატერინე ფარულავა პროფესიით ექიმია. სიახლის და ექსპერიმენტების ძიებაში მან ჰობი ბიზნესად აქცია.

მას შემდეგ რაც ინტერნეტში ნახა ვიდეო, როგორ მოუმზადა ქალმა შვილს მისთვის საძულველი ბოსტნეულისგან კანფეტები, თვითონაც ცუკატების კეთებით დაინტერესდა.

„ძალიან მიყვარს გოგრა და როგორც კი მოვიდა გოგრის სეზონი, შევიძინე და დავამზადე ჩემს სამზარეულოში. პირველი დეგუსტატორი იყო მეუღლე, რომელიც კვების ტექნოლოგია. დავიწყე სხვადასხვა ვარიანტების კეთება. ინტერნეტში მოძიებული რეცეპტით, ინტერვალებით 15 წუთი უნდა მოგვეხარშა, მაგრამ საერთოდ არ ვხარშავ. მოვახერხე შაქრიანობის შემცირება. შრობის პროცესიც არ ადის 100 გრადუსზე, ამიტომ მაქსიმალურად შენარჩუნებული აქვს სასარგებლო თვისებები“.

პირველი პროდუქცია - გოგრის ცუკატი დარიჩინით, ვანილით საშობაო ბაზრობაზე გაიტანა.

„გასინჯეს ახლობლებმა, მეგობრებმა, თუმცა ვერ მიხვდნენ რა იყო. როცა გაიგეს, რომ ეს იყო გოგრა, მირჩიეს რომ სერიოზულად მომეკიდა ხელი ამ საქმისთვის. გოგრა მეგრულად კოპეშიაა და სახელიც მეგობარმა - „კოპეშონი“ დაარქვა. ეს არის ისტორია, თუ როგორ გადაიქცა ჰობი საქმედ“.

ამის შემდეგ მიიღო მონაწილეობა ერთ-ერთ საგრანტო კონკურსში, რომლის საშუალებითაც ბოსტნეულის საჭრელი დოლურა შეიძინა და დაიწყო ექსპერიმენტები სხვადასხვა ბოსტნეულით.

„გავსინჯე სტაფილო, დავამზადე ლიმნით, ჭარხალი მიხაკით და ილით, სეზონზე ცუკინი როზმარინით და პიტნით, მწვანე პომიდვრის, კიტრის, ასევე გემრიელია ციტრუსი, მაგრამ ჯერ ორიენტირებული ვარ ბოსტნეულზე. ვგეგმავ კიდევ სხვა ბოსტნეულის დატესტვას“.

ცოტა ხნის წინ კი ამერიკის საერთაშორისო განვითარების სააგენტოს პროექტმა „ზრდამ“ გადასცა ბოსტნეულის საშრობი, რომელიც მეწარმეს მისცემს ბიზნესის გაფართოების, მეტი პროდუქციის წარმოების და სხვების დასაქმების საშუალებას.