17 წლის მარიამ ნარმანიამ გადანახული ნაჭრებით ასი ცალი პირბადე შეკერა. ნაწილი ახლობლებისთვის გალში გააგზავნა, ნაწილი კი ასევე ახლობლებს, ზუგდიდში დაურიგა.

"ნაჭერი მქონდა გადანახული და პანდემიის გამო გადავწყვიტე პირბადეები შემეკერა. ვიფიქრე, რომ ასე გალის მოსახლეობას დავეხმარებოდი", - ამბობს მარიამი.

პირბადეების შეკერვა კიდევ სურს, მაგრამ ნაჭერი უკვე აღარ აქვს. შეძენას კი კარანტინის გამო ვერ ახერხებს.

"ახლა მეტი ნაჭერი არ მაქვს, თორემ დიდი სიამოვნებით გავაკეთებდი კიდევ, მიუხედავად იმისა, რომ თითებშიც ბუშტები ჩამიჯდა", - თქვა მარიამმა.

მარიამი აფხაზეთიდან დევნილია და ზუგდიდის სოფელ ახალაბასთუმნის საჯარო სკოლაში სწავლობს. ამბობს, რომ აფხაზეთთან ახლაც ბევრი რამ აკავშირებს:

"ბებია მყავს აფხაზი. პატარა ვიყავი, ენგურის ხიდზე გადავდიოდით ისე მამას ესროლეს, რის გამოც მამას ბევრი ოპერაციის გაკეთება დასჭირდა. ახლაც ავადაა. ეს ჩემთვის დღემდე ძალიან დიდი ტკივილია და ამიტომაც მინდა, რომ სხვებს დავეხმარო".

მარიამი თავისუფალ დროს ხატავს და კერავს. ამბობს, რომ მისთვის ქველმოქმედებაში მონაწილეობა პირველი არ არის. უფრო ადრე, საკუთარი ნამუშევრები გაყიდა და თანხა სიმსივნით დაავადებულთა დასახმარებლად გადარიცა.