პიკასო, მაკო, ორი ნიკოლოზი და კიდევ სხვები, ახალგაზრდა სკეიტერები არიან და ზაფხულობით, ყოველ საღამოს იუსტიციის სახლის უკან, სკეიტ პარკში იკრიბებიან. ზუგდიდში სულ რაღაც ერთი თვეა კლუბი დააფუძნეს დიდი მიზნებით - ბავშვებს, მოზარდებს განვითარების, ჯანსაღი ცხოვრების ალტერნატიული პლატფორმა შესთავაზონ. თავიდან სულ ათნი იყვნენ, დღეს კი უკვე სამოცამდე არიან. ფინანსები არ აქვთ, საჭიროებები ბევრი.

პიკასო, იგივე ირაკლი თორდია ამ კლუბის ხელმძღვანელია და კლუბის წევრებს ეთათბირება, სიახლეებს აცნობს. სკეიტბორდებზე ფეხმორთხმით სხედან ახალგაზრდები. ზოგი კედელს აყუდებულა. მათ სკეიტზე დგომისთვის აუცილებელი დამცავი საშუალებები არ აქვთ. არც სივრცე ყოფნით, რომელსაც სიმბოლურად კი ჰქვია სკეიტ პარკი, თუმცა შესაბამისად ადაპტირებული არ არის, უფრო ველომოყვარულებზე გათვლილიაო, გვითხრეს.

კლუბს ცოტა ხნის წინ შემოუერთდა 14 წლის მაკო მესხია. მართალია სკეიტბორდზე სამი წელია დგას, მაგრამ მთელი ამ ხნის მანძილზე ისეთი რაღაცები არ მისწავლია, რაც აქ სამ კვირაში მასწავლესო. მაკოს თხოვნაა ჰქონდეთ მეტი ტერიტორია იმისთვის, რომ უკეთეს სკეიტერებად ჩამოყალიბდნენ. ეს სივრცე მე კი მყოფნის, თუმცა არა დანარჩენ ახალგაზრდებსო.

"გვჭირდება თუნდაც სამუხლეები, პატარა ბავშვებმა, დამწყები ვინც არის, თავი რომ დაიცვან. შეიძლება ეს სივრცე დამწყებებს ეყოთ, მაგრამ ვინც უკვე პროფესიონალია, იმისთვის ცოტაა. ველოსიპედი, სკეიტი საზაფხულოდ ძალიან სახალისოა და ზაფხულის დღეებს უფრო უკეთესს ხდის", - უთხრა მოზარდმა "ლაივპრესს".

კლუბის კიდევ ერთი წევრია ნიკოლოზ ჭეჟია. ის უკვე ორი წელია ამ სპორტს მისდევს, ძალიან მოსწონს და სკეიტბორდზე დგომას მომავალშიც აპირებს. თავიდან გაუჭირდა. შემდეგ უფროსი მეგობარი, რატი ქარდავა დაეხმარა. მერე პიკასოც გაიცნო და კლუბში დაფუძნების დღიდან გაწევრიანდა. განვითარებისთვის პროფესიონალი სკეიტერების ვიდეოებსაც უყურებს და ერთმანეთისგანაც სწავლობენ.

"დამცავი საშუალებები ყველას სჭირდება. აქ არის პატარა რამპა. აქედან ჩამოსვლისას შეიძლება ნებისმიერ დროს დაზიანდე. შეიძლება სკეიტით სხვამ გამოიაროს, ველოსიპედითაც. მეორეხარისხოვანია ჩემთვის რამპა. პირველხარისხოვანია ეკიპირება", - გვითხრა ნიკოლოზმა.

12 წლის სკეიტერიც ფიქრობს, რომ სავარჯიშოდ პატარა სივრცე აქვთ. ამბობს - მართალია პარკი დიდია, მაგრამ ზოგან ფილები ამოყრილია, ზოგან კი ისეთია დაგებული, საკატაოდ არ გამოდგებაო.

სკეიტბორდი ჩემი გადმოსახედიდან არის პირველ რიგში თავისუფლება და დამოუკიდებელობა ყველაფრის მიმართ, - ასე ფიქრობს კლუბის დამფუძნებელი პიკასო, იგივე ირაკლი თორდია. როცა სკეიტზე დგახარ, რაღაც საოცარი გრძნობა გეუფლება. მითუმეტეს, როცა მარტო ხარ, თავი სამყაროს საწყისი წერტილი მგონიაო.

ჯერ კლუბი სრულფასოვნად არც ჩამოყალიბებულა და გარკვეულ საკითხებზე მუშაობა გრძელდება. მისი მიზანია ბავშვები არა ქუჩაში იდგნენ, არამედ ჰქონდეთ მოტივაცია და ინტერესი ახალი საქმის კეთების. ყოველ საღამოს, 6 საათზე იკრიბებიან. ერთმანეთს გამოცდილებას უზიარებენ და ახალ მოძრაობებს სწავლობენ.

თავად სკეიტზე 12 წელია დგას. ახალგაზრდების ვარჯიშში ხუთკაციანი "სტაფი" ეხმარება. კლუბის დაფუძნებამდე ბავშვებთან სათითაოდ მოუწია მისვლამ, გასაუბრებამ, რომ მსგავსი რამე ჩაიფიქრეს და თუკი სურვილი ექნებოდათ, მათთვის კარი ღია იყო.

"იყო ისეთი მომენტები, ერთ დღეს მოვიდოდნენ, მეორე დღეს არ მოვიდოდნენ. ახლა უკვე მდგრადი სიტუაციაა. ძალიან მიხარია, რომ ასეთი რაღაც ზუგდიდში ხდება, რაც არასდროს არ ყოფილა. ისეა ჩვენი ქალაქი ცნობილი, მკვდარი ქალაქი, ყველაზე ცუდი ქალაქი, ყველაზე მიჩუმებული. დღეს ზუგდიდი აშკარად ყვირის, რომ იცი რა, ჩვენ, ახალგაზრდობა აქ ვართ და რაღაცას ვაკეთებთ", - გვითხრა პიკასომ.

მისი თქმით, პრობლემებსა და საჭიროებებზე მუნიციპალიტეტის მერს უკვე ესაუბრნენ და დახმარების პირობაც მიიღეს. კერძოდ, რომ 30 ბავშვისთვის დამცავ ეკიპირებას დაუფინანსებენ. ილაპარაკეს სკეიტპარკისთვის საჭირო ინფრასტრუქტურის მოწყობაზეც იმავე, ან სხვა ტერიტორიაზე.

პიკასო სამომავლოდ კლუბის განვითარებაზეც ფიქრობს. შესაძლოა სპონსორი მოიძიოს, ან აუცილებელი სახსრები ადგილობრივი ხელისუფლებისგან მიიღონ.

თავის მხრივ, ზუგდიდის მერიაში ამბობენ, რომ იზიარებენ და მხარს უჭერენ ახალგაზრდების ინიციატივას. მათივე თქმით, იზრუნებენ სკეიტ პარკში სპორტული ინფრასტრუქტურის გაუმჯობესებაზე, სკეიტერთა უსაფრთხოების და განვითარებისთვის და პრობლემები, რომლებზეც დღეს მოზარდები საუბრობენ, ეტაპობრივად მოგვარდება.