აქ ახლა რიგი უნდა იყოს, - ამბობს 69 წლის რუბენ გახარია და მოსაცდელი ოთახის ოდნავ შეღებული კარიდან იხედება კაბინეტში, სადაც წუთი წუთზე მისი ცოლი უნდა აცრან კორონავირუსის საწინააღმდეგო ვაქცინით.

პენსიონერი მეუღლესთან და უმცროს ძმასთან ერთად მოვიდა ზუგდიდის რეფერალურ საავადმყოფოში, რომელიც დღეისთვის ერთადერთი სამედიცინო დაწესებულებაა რეგიონში, სადაც მოქალაქეებს აცრები უტარდებათ. როგორც კი პანდემია გამოცხადდა და მსოფლიომ აქტიურად დაიწყო ვაქცინაციის საჭიროებაზე საუბარი, იმ დღიდან ღმერთს ვთხოვდი, როგორმე მომეხერხებინა ინფიცირებისთვის თავის არიდება ვაქცინის შექმნამდე და მის ამოქმედებამდეო, გვითხრა. მართალია ცოტა ინერვიულა, მაგრამ ასტრაზენეკათი აცრის შემდეგ თავს კარგად გრძნობს. ვაქცინას არავითარი გვერდითი მოვლენა არ მოჰყოლია. მის ჯანმრთელობის მდგომარეობას დაყოვების ოთახში ექიმები აკვირდებიან.

ხომ კარგად ხართ, რამეს ხომ არ უჩივით? - ყოველ ხუთ წუთში ეკითხებიან. ყველაფერი რიგზეა.

69 წელი არაა ცოტა, ჩემი ასაკის ყველა მოქალაქე უნდა აიცრასო, ამბობს. მეზობლებს, ახლობელ ადამიანებს, ყველას იგივეს ურჩევს. ე.წ. ანტივაქსერულ კამპანიას ყურს არ უგდებს, აღარ უსმენს ნეგატიურ ინფორმაციებს და ჯიუტად სჯერა, რომ სწორედ საყოველთაო ვაქცინაციაა ერთადერთი გზა პანდემიის შესაჩერებლად.

"რიგები უნდა იდგეს აქ. ამ შენობის სხვა შესასვლელში ვნახეთ ხალხმრავლობა და გავჩერდით. გვეგონა, რომ აცრას იქ აკეთებდნენ. ამას გიკეთებს, ამდენი იწვალა მთავრობამ, ხალხმა შენთვის და შენ მტრისკენ ხარ?", - უკვირს რუბენ გახარიას მოქალაქეთა პასიურობის.

ყველაზე მეტად პანდემიამდელი ურთიერთობები მოენატრა. პირველი, რასაც კორონავირუსის დასრულების შემდეგ გააკეთებს, მეგობრებთან აქტიური, ძვლებური თავშეყრების განახლებაა, რომელიც დღეს ასე ძალიან აკლია. სახლში ყოფნა მობეზრდა. პირბადით ჯერჯერობით მეზობლებში გადადის და მათთან საუბრით ინაზღაურებს დანაკლისს.

პირველ იანვარს 70 წელი მისრულდება და გეპატიჟებითო. იმედი აქვს, რომ მაშინ მაინც აღარ მოერიდებიან ადამიანები ერთმანეთს.

კორონავირუსი ხო არ გადაგიტანიათ? ალერგიული ხართ? რაიმე ოპერაცია თუ დაგჭირვებიათ, ან შრატი? - ვაქცინაციის კაბინეტში კითხვარი ივსება, რომელსაც აცრის დანარჩენი მომლოდინეები მოსაცდელი ოთახიდან აყურადებენ. კითხვებს ხმადაბლა, ჩურჩულით პასუხობენ სათავისოდ და ეღიმებათ. ეს რეპეტიციის იმიტირებას ჰგავს სცენაზე გასვლის წინ.

უკვე აიცრა რუბენ გახარიას ცოლი, 69 წლის ლია სალიაც. ახლა დაყოვნების ოთახში ელოდება 45 წუთის გასვლას. თავდაპირველმა მღელვარებამაც ჩაიარა. რისკ ჯგუფში ვარ ასაკის გამო, ამიტომაც დავთანხმდიო მეუღლეს ვაქცინაციაზე. ლია დარწმუნებულია, რომ კორონავირუსით ინფიცირება გაცილებით დიდი რისკია მისთვის და დანარჩენებისთვის, ვიდრე აცრა.

მართალია თავიდან არ უნდოდა, ცოტა ეშინოდა კიდეც, თუმცა ახლა სჯერა ვაქცინის სარგებლის. ბევრ რამეს წერენ და ამბობენ, მე აღარ ვუსმენ უკვეო, გვითხრა ანტივაქსერული კამპანიის პასუხად. ახლა ბევრად მშვიდად იქნება. კიდევ უფრო მშვიდად მაშინ, როცა ბევრი მოქალაქე ჩაერთვება ვაქცინაციის პროცესში და საერთო იმუნიტეტი გამომუშავდება. მხოლოდ ეს დაასრულებსო პანდემიას.

"ბევრჯერ მითქვამს, რა დრო დადგა, რომ გეშინია ყველაფრის. სტუმრად ვიყავი ერთხელ და ცოტა მჭიდროდ ვიჯექით. ათი დღე მქონდა თითქოს დისკომფორტი, რამე ხომ არ არის, ვიღაც ხომ არ იყო იფიცირებული. ძმა მყავს, რომელმაც გულის ოპერაცია გაიკეთა. მასთან არ მივსულვარ ეს პერიოდი. აივანზე იყო და 5 წუთი ვეკონტაქტე", - გვითხრა ვაქცინირებულმა ლიამ.

პანდემიაში ჯერ კიდევ უწევს დადგენილი რეგულაციებით ცხოვრება. პირბადე და ჯიბით სადეზინფექციო ხსნარი სულ თან დააქვს.

ასტარზენეკათი აიცრა რუბენ გოგოხიას უმცროსი, 66 წლის ძმა, ემზარ გახარიაც. აქ იმიტომ მოვედი, რომ კორონავირუსისგან საკუთარი ჯანმრთელობა დავიცვაო. აცრის შემდეგ თავს კარგად გრძნობს და სხვებსაც ურჩევს, თამამად ჩაერთონ ვაქცინაციის პროცესში.

სამეგრელოს რეგიონში, დღეისთვის აცრილია სულ 158 მოქალაქე. მათ შორის არიან როგორც სამედიცინო სფეროს, ისე მოქალაქეთა სხვა ჯგუფის წარმომადგენლები. ზუგდიდის საზოგადოებრივი ჯანდაცვის ცენტრის ხელმძღვანელმა ნანა ოდიშარიამ "ლაივპრესს" უთხრა, რომ რეფერალურ საავადმყოფოში ამ დრომდე ვაქცინაცია 98 პირს ჩაუტარდა. დანარჩენი აცრები კი რეგიონის მასშტაბით მოქმედ სხვა ლოკაციებზე ჩატარდა. ეს მანამ, სანამ ხელისუფლების და ჯანდაცვის სპეციალისტები არ მიიღებდნენ გადაწყვეტილებას, პროცესის მხოლოდ რეანიმაციული განყოფილების მქონე დაწესებულებებში გაგრძელების.

აცრილთაგან 69, სამედიცინო დაწესებულებებში დასაქმებულია.

"ეს ციფრი ძალიან დაბალია, მაგრამ დამატებით გეტყვით, რომ ჩვენი რეგიონის მოსახლეობის და სამედიცინო სფეროს წარმომადგენელთა ნაწილიც ფაიზერის ვაქცინით ასაცრელად დარეგისტრირდნენ რეგიონის გარეთ არსებულ სამედიცინო სერვისის მიმწოდებელ დაწესებულებებში, როგორიცაა ქუთაისი, ბათუმსა და თბილისში", - განმარტა ნანა ოდიშარიამ.

თუ რამდენია ასეთი პირი, მისი თქმით, მონაცემები ახლო მომავალში ექნება.

საქართველოში 15 მარტს დაიწყო ქვეყნის მასშტაბით ვაქცინაციის პროცესი, ჯერ ასტრაზენეკათი, შემდეგ კი ფაიზერის ვაქცინებით. დღეისთვის აცრილია სულ 11 603 მოქალაქე. მათ შორის არიან სამედიცინო სფეროს წარმომადგენლებთან ერთად, 55 და 65 წელს ზემოთ პირები.

ბოლო 24 საათში, დაავადებათა კონტროლის ეროვნული ცენტრის ინფორმაციით, აიცრა 758 მოქალაქე.

ქვეყანამ შაბათს მიიღო ჩინური კომპანია "სინოფარმის" მიერ წარმოებული ვაქცინის 100 ათასი დოზა. კიდევ ამდენივე ჩინური სინოვაკის ვაქცინას კი საჩუქრად მიიღებს. "სინოფარმი" ჯანდაცვის მსოფლიო ორგანიზაციიდან აპრილის შუა რიცხვებში ავტორიზაციის მიღებას, რომლის შემდეგაც მისი გამოყენება საქართველოში დაიწყება.