ვიდეო
რობოტი „თამადა“ და კედლის სათბური - ზუგდიდელი ახალგაზრდების გამოგონება ბაზარზე გასავლელად ემზადება [ვიდეო]
FaceBook Twitter
E-mail Print
ზუგდიდში ახალგაზრდები მუდმივად უჩივიან შემეცნებით-გასართობი სივრცეების სიმწირეს, სადაც იდეების გენერირებას მოახდენენ, ერთმანეთს მოუსმენენ და რაიმე ისეთ ღირებულს შექმნიან, განვითარებაში რომ დაეხმარებათ. თუმცა, შეზღუდული არჩევანის პირობებშიც კი, ზოგიერთი ახერხებს იპოვოს საინტერესო საქმე და საკუთარი შემოქმედებით თანატოლებისთვის მაგალითად იქცეს.

ასე მოხდა რამდენიმე დღის წინაც, როცა ინოვაციების და ტექნოლოგიების სააგენტოს მიერ გამოცხადებულ კონკურსში -Hardware startup ინკუბატორი, ზუგდიდელმა ახალგაზრდებმა მე-2 და მე-3 საპრიზო ადგილები დაიკავეს. ჟიურისთვის საინტერესო აღმოჩნდა მათ მიერ შექმნილი პროტოტიპები, რომლის დახვეწაც მომავალში, მიღებული ფულადი გრანტის დახმარებით იგეგმება.

ორივე სტარტაფ იდეა, ქვეყნის მასშტაბით 45 გუნდის ნახელავს შორის შეირჩა.

რობოტი თამადა გულბათი, სამენოვანი სადღეგრძელოებით

გულბაათი - ასე ჰქვია რობოტ თამადას, რომელიც ოთხმა მოზარდმა ზუგდიდის ტექნო პარკში, კონკურსისთვის ააწყო. რობოტი აპლიკაციის მეშვეობით იმართება და 24-ამდე სადღეგრძელოს მეგრულ, ქართულ და ინგლისურ ენებზე ამბობს. საუბრის პარარელურად, ამოძრავებს თავს, ხელებს და პირს. გულბათმა და მისმა შემქმნელებმა მეორე ადგილი დაიკავეს კონკურსზე და გრანტის სახით 6 000 ლარიც მიიღეს.

16 წლის სესილი ბერიშვილი ამბობს, რომ საქართველოში თამადის საუკუნოვანი კულტურა აქვთ, გულბაათი კი სამეგრელოში ცნობილი თამადა ყოფილა. ასე, საკონკურსოდ დაიბადა რობოტი ქართული ელემენტებით, ჩაცმულობით, ყანწით ხელში და ულვაშებით, როგორც ამ კულტურის გამომხატველი პერსონაჟი:

"თავიდან არანაირი იდეა არ გვქონდა. გავდიოდით ტრენინგებს და მის ფარგლებში ვეცნობოდით სხვადასხვაგვარ რობოტს. იმ დროს იმართებოდა ათასწლოვანის ინოვაციური პროექტი. ჩემს მეგობრებს წარდგენილი ჰქონდათ რობოტი გიდი და მივხვდით, რომ ეს გიდი იყო კულტურული ღირებულების მქონე. ჩვენც გადავწყვიტეთ, რაიმე კულტურული ღირებულების მქონე გაგვეკეთებინა. ასე წამოვიდა თამადის შექმნის იდეა. ძალიან დაგვეხმარა ჩვენი მენტორი, უტა კილასონია".

სესილი ტექნოპარკში თითქმის ორ წელია დადის. აქ ყოფნა მოსწონს. მისი თქმით, ეს სივრცე დაეხმარა ყველასთვის დაემტკიცებინა, რომ გოგოს და ბიჭის საქმე არ არსებობს, და რასაც კი ჩაიფიქრებს, ყველაფერი გამოუვა:

"როცა ვამბობდი, რომ ეს და ეს მაინტერესებს, ყოველთვის არ მოდიოდა დადებითი ემოციები. ეგონათ, რომ მაინც გოგოა და რაღაცას ვერ იზამს. არ აქვს მნიშვნელობა ვინ ხარ. მთავაარია შენი შესაძლებლობები. იმიტომ მომწონს ეს ადგილი, რომ აქ რეალუად დამანახეს ის, რასაც ამბობდნენ, რომ შენ უბრალოდ არ შეგიძლია, თურმე შესაძლებელია".

ახალგაზრდების გუნდი რობოტ თამადაში უფრო მეტი სადღეგრძელოს ჩაშენებას გეგმავს, მოძრაობებიც მეტად დაიხვეწება. სამომავლოდ კი, განახლებულ ვერსიას ონლაინ გაყიდიან. ფიქრობენ, რომ მსურველი ბევრი იქნება. მათ შორის უცხოელი ტურისტებიც. პარარელურად, მოზარდები შემეცნებითი, სახალისო, ინოვაციური, კულტურული თემატიკის მქონე სხვა რობოტების წარმოებასაც ფიქრობენ მიღებული ფულადი გრანტის დახმარებით.

სესილის თანაგუნდელი გიგი გამსახურდია გვიხსნის, რომ რობოტი "თამადის" უნარების გასაუმჯობესებლად, შესაძლოა ჩინურ კომპანიებთან ითანამშრომლონ. "გულბაათმა" მომავალში სუფრის წევრების და იუბილარის სახელის დამახსოვრება უნდა შეძლოს.

"ეს დაგვეხმარება ინვესტიციების, გრანტების მოზიდვაში, რომ ჩავუშვათ ბაზარზე თამადა და სხვა რობოტები. ბევრი გამოცდილი ადამიანის აზრი მოვისმინეთ, რომ ერთ-ერთი გაყიდვადი პროდუქტი იქნება", - ამბობს გიგი.

კედლის დეკორატიული სათბური

ზუგდიდელი ახალგაზრდების მეორე ჯგუფმა Gრეენ ჭალლ, კონკურსზე კედლის დეკორატიული სათბურის პროტოტიპი წარადგინა და მესამე საპრიზო ადგილი, 4 000 ლარის გრანტთან ერთად მიიღო. მარტივი მოწყობილობის მიზანი სხვადასხვა, მათ შორის შერეული კულტურის მოყვანაა ერთდროულად. სათბური მონტაჟს არ საჭიროებს. კონსტრუქციის დადგმა სახლის ნებისმიერ კუთხეშია შესაძლებელი ინტერიერის დაზიანების გარეშე.

დავით სარსანია ამბობს, რომ მათი გამოგონება ადამიანებს მისცემს შესაძლებლობას, მინიმალური დანახარჯებით მეწარმეები გახდნენ და მოწეული ხილი ან ბოსტნეული ბაზარზე გასაყიდად გაიტანონ ზედმეტი ძალისხმევის გარეშე. დღეს ახალგაზრდა გამომგონებელთა მიზანია, კედლის სათბური უფრო მოქნილი გახდეს.

"ქოთნის დიზაინი ისეთი შევარჩიეთ, რომ არ გაიჩეროს წყალი და არ გამოიწვიოს სოკოვანი დაავადებები. ლედ ან სოდიუმის სანათები დამონტაჟდება სექციაზე, რაც მცენარეს ფოტოსინთეზის პროცესში დაეხმარება. კონტეინერის ზომა საკმარისია იმისთვის, რომ ხარისხიანი ფესვთა სისტემა წარმოიშვას. ეს აუზი შეგვიძლია გამოვიყენოთ როგორც წყალარინების სიტემად, ისე ტერარიუმად და აკვარიუმად. გვინდა ბუნება მაქსიმალურად შემოვიყვანოთ ინტერიერში", - გვიხსნის დავითი.

მისი თქმით, მომავალში სათბური დაიხვეწება და პლასტმასის კონსტრუქციაც მაქსიმუმ 3 მეტრის სიმაღლეზე გაიშლება. სიმაღლის მართვას კი მომხმარებელი თავად შეძლებს.

ახალგაზრდების სურვილია, კედლის ინოვაციური ბაღი ყველა მსურველისთვის ხელმისაწვდომი იყოს და მისი ღირებულება 600-დან 1000 ლარის ფარგლებს არ გაცდეს. ამისთვის, მიღებული გრანტით დანადგარებს შეიძენენ პლასტმასის საწარმოებლად და ხარჯების შესამცირებლად.

კონკურსის პრიზიორმა გუნდმა სათბური მარწყვის მოსაყვანად უკვე დატესტა. 40-მა კონტეინერმა მათ 24 კილგრამი მარწყვი მისცა. 20 კილო გაყიდეს და 120 ლარის შემოსავალიც მიიღეს.

"ჩვენი მოტივაციაა, საგანმანათლებო დაწესებულებებში შევიტანოთ და ბავშვებს მივცეთ საშუალება, თავიანთი წვლილი შეიტანონ კულტურების მოყვანაში და განავითარონ უნარები აგრო მიმართულებით", - ამბობს დავით სარსანია.

მისი თანაგუნდელი ალექსი ესებუა, კონსტრუქციის უპირატესობაზე საუბრობს. კედლის სათბურის აწყობა ყველას ინდივიდუალურად შეეძლება. მაქსიმუმ 40 ქოთანში კი, ერთი ან რამდენიმე სახის კულტურას მოიყვანს მომხმარებელი.

მცენარეთა მორწყვა ჭკვიანი - წვეთოვანი სისტემით ხდება. იმისთვის, რომ ფოთლებმა ტენიანობა შეინარჩუნონ, წყლის ორთქლით მორწყვის სისტემა იმუშავებს. დატენიანების მაჩვენებელს სპეციალური მოწყობილობა გააკონტროლებს და საჭირო ოდენობის ტენის გამომუშავების შემდეგ, ავტომატურად გამოირთვება.

კედლის სათბურის გასაყიდად გატანას, ახალგაზრდა ინოვატორები ქართულთან ერთად უცხოურ ბაზრებზეც გეგმავენ.

ზუგდიდელი გამომგონებლების აზრით, მათი მიღწევები თანატოლებისთვის სტიმულია, აკეთონ რაღაც სასარგებლო და ხშირ შემთხვევაში მომაბეზრებელი ერთფეროვნება, საკუთარი მონდომებით შეცვალონ.

პროექტმა საქართველოს 8 ქალაქი მოიცვა. ახალგაზრდები პროგრამირების და ელექტრონიკის მიმართულებით გადამზადდნენ. ისწავლეს როგორ შექმნან კონკრეტული პროდუქტის პროტოტიპი და მიანიჭონ მათ ფუნქცია. ორგანიზაცია "ქლივერტონის" ტრენერების დახმარებით კი, ბიზნესის ტრენინგ-კურსებიც გაიარეს.

რაც მთავარია ისწავლეს, როგორ გაიტანონ ბაზარზე საკუთარი იდეა, სამომავლოდ კი ამ ყველაფრისგან შემოსავალი მიიღონ.

პირველი წარმატების შემდეგ, ზუგდიდელი ახალგაზრდების მთავარი საზრუნავი ახალ გამოწვევებზე მუშაობაა.


Print E-mail
Twitter
სხვა მასალები
ზუგდიდის სოფელ დარჩელში, კიროვის უბანში, ძლიერი წვიმების დროს
მდინარე ჯუმი დიდდება, კალაპოტიდან
15:01 / 23.11.2022
ზუგდიდის სოფელ დარჩელში, კიროვის უბანში, ძლიერი წვიმების დროს მდინარე ჯუმი დიდდება, კალაპოტიდან
უმუშევრობა საქართველოსთვის ერთ-ერთი მთავარი გამოწვევაა.
ადამიანები ასაკის და სქესის განურჩევლად სამსახურს ეძებენ,
10:07 / 08.11.2022
უმუშევრობა საქართველოსთვის ერთ-ერთი მთავარი გამოწვევაა. ადამიანები ასაკის და სქესის განურჩევლად სამსახურს ეძებენ,
ახალგაზრდებს, რომლებიც სოფლად ცხოვრობენ, გაცილებით მეტი
საჭიროებები აქვთ. იმისთვის, რომ განვითარდნენ და გარემო
10:50 / 25.10.2022
ახალგაზრდებს, რომლებიც სოფლად ცხოვრობენ, გაცილებით მეტი საჭიროებები აქვთ. იმისთვის, რომ განვითარდნენ და გარემო
მერი (კეკე) გულუა უკვე 60 წელია ჩხოროწყუს სოფელ ხაბუმეს სკოლაში
ასწავლის. რამდენიმე წლის წინ სახელმწიფოს
09:55 / 07.10.2022
მერი (კეკე) გულუა უკვე 60 წელია ჩხოროწყუს სოფელ ხაბუმეს სკოლაში ასწავლის. რამდენიმე წლის წინ სახელმწიფოს
კორონავირუსი

საბჭოთა რეპრესიები

ფოტო
სკოლაში პირბადით - სწავლა საკლასო ოთახებში განახლდა [ფოტო]
დღეს, 4 ოქტომბერს სასწავლო პროცესი, რომელიც პანდემიის
ვაქცინაცია ავტობუსში [ფოტო]
ზუგდიდის მუნიციპალიტეტის სოფლებსა და ქალაქში
„გვიხარია, რომ მოქალაქეები აქტიურობენ“ - ვაქცინაცია ზუგდიდში [ფოტო]
მოქალაქეთა საყოველთაო ვაქცინაცია ზუგდიდში გრძელდება.
"აქტიურობა მაღალია" - ზუგდიდში "ფაიზერით" ვაქცინაცია დაიწყო [ფოტო]
კორონავირუსის საწინააღმდეგო ამერიკული წარმოების "ფაიზერით"
3 თვე კოვიდტესტირების რეჟიმში - ფოტორეპორტაჟი ენგურის ხიდიდან
აფხაზეთ-სამეგრელოს საოკუპაციო ხაზთან, ენგურის ხიდზე,
მზარეულის მაგიდა
მწყრის ხარჩო მეფურად [ვიდეო]
ხარჩოს მოსამზადებლად დაგვჭირდება:
ხარკალია ლებია
ხარკალია, ძველი მეგრული კერძია,
მარწყვის პანაკოტა
უგემრიელესი დესერტი
ხაჭოს პასკა
ინგრედიენტები
                                     ლეჭკერე
ხულიშ ლეჭკერე - ეს არის ძველი
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.